احنا فى حظر
احنا فى حظر
*******************
محظور تخرج أو تتكلم
أو حتى تسلم
لكن مسموح لك تتألم
بس كمان من غير صوت
مسموح تبكي بس ما تشكي
تفضل ساكت لما تموت !
وملكش حضور
أصلك محظور
الحظر محصل أتفاسك فا متتنفس
وحط كمامة عشان عدوى كلامك
فا متتكلمش
أصل كلامك مش هيأثر ولا هيغير مجرى الريح
الريح دى قوية و ما بترحمش
يا غيطان برسيم مستنيه الحش
المنجل حامي ومسنون ما تخفش
وسريع زى النار لما بتمسك قلب القش
والقش عبيط مستني النار لما تقش
خليك ع الدور خليك فى طابور
واوعي تفكر لحظة حد يشوفك من غير طرطور
ما انت مافيش غير حلين
يا تطبل ...
يا هتفضل تسمع طبل
من غير ما تمل
من غير ما تهش
واوعى تفكر
دا الحظر كمان ع الفكر
وما لكش حقوق
انت يادوب زى الدود
اللى فى وسط شقوق
ومحصلتش دود المش
بس انت أسكت وما تتكلمش
ممتاز كده من غير صوت
واشرب مر
لما هيجي عليك الدور وتموت
يتفك الحظر
((الشاعر / رمضان بقشيش))
ليست هناك تعليقات